Некалькі гадоў таму кіраўнік краіны выдаў загад прыбіраць у вёсках пустыя дамы, якія не маюць гаспадароў і прыйшлі ў непрыдатны стан. Прычым, прыбіраць трэба ўсё, нават падмуркі. Канечне, у гэтым ёсць свой сэнс, разваленыя дамы не павінны псаваць выгляд вёскі.
Але не заўсёды на гэта хапае грошай, таму парадак наводзіцца ў асноўным там, дзе блізка праходзяць цэнтральныя дарогі, дзе часцей праязджае вышэйстаячае начальства. А вось у глыбінцы так не робіцца. Напрыклад, стаяла ў вёсцы Завараты хата. Была яна яшчэ моцная, хоць і пабудаваная ў 1900 годзе. Але гаспадары памёрлі ў сярэдзіне 90-х гадоў мінулага стагоддзя, іх унук забраў з хаты шыфер, доскі са столі і падлогі. Хата яшчэ прастаяла гадоў пяць, і вось мясцовая гаспадарка вырашыла разабраць яе на дровы. Тое, што можна было спаліць, забралі на дровы, тое-сёе забралі людзі, а смецце так і валяецца. Ужо можа хай бы лепш яна стаяла. http://www.westki.info
|