Адмова ад асабістых выбарчых фондаў кандыдатаў на мясцовых выбарах апраўдана,
мяркуе кіраўнік Цэнтрвыбаркама Лідзія Ярмошына. Такую думку кіраўнік
ЦВК выказала 16 лютага ў Мінску на семінары "Роля сродкаў масавай
інфармацыі ў забеспячэнні канстытуцыйных правоў грамадзян пры правядзенні
выбарчых кампаній".
Папраўкі ў выбарчае заканадаўства, прынятыя парламентам у канцы 2009
года, прадугледжваюць стварэнне асабістых фінансавых выбарчых фондаў толькі для
кандыдатаў у прэзідэнты і ў дэпутаты Палаты прадстаўнікоў.
"Заканадаўства нацэлена на тое, каб у мясцовыя органы ўлады выбіраліся
вядомыя ў рэгіёнах людзі. Іх і так ведаюць, ім не патрэбна дадатковая рэклама.
Апрача таго, у сельскай мясцовасці далёка не ўсе змогуць сфарміраваць такі
фонд", — сказала Ярмошына.
Кіраўнік Цэнтрвыбаркама паведаміла, што кандыдаты ў дэпутаты мясцовых саветаў
часта нават не выкарыстоўваюць выдзяляемую з бюджэту суму на выраб улётак.
"Калі б мы ўвялі магчымасць стварэння выбарчых фондаў кандыдатаў у
дэпутаты мясцовых саветаў, гэта азначала б адрыў ад рэчаіснасці", — мяркуе
Ярмошына.
БелаПАН