У склад акруговых выбарчых камісій уключаныя
72 прадстаўнікі апазіцыйных палітычных партый. Пра гэта
БелаПАН паведаміў сакратар
Цэнтральнай камісіі па выбарах і правядзенні рэспубліканскіх рэферэндумаў
Мікалай Лазавік.
Агулам у склад 367 акруговых камісій уключаныя
4542 чалавекі. Сярод іх 527 дзяржслужбоўцаў, 467 чалавек да 30 гадоў, 2944
жанчыны.
У склад акруговых камісій увайшлі 828 (18,2%) прадстаўнікоў працоўных
калектываў, 1.955 (43,0%) — грамадскіх аб'яднанняў, 301 (6,7%) — палітычных
партый; 1457 чалавек (32,1%) высоўваліся грамадзянамі шляхам збору подпісаў.
Што датычыць палітычных партый, то больш за ўсё ў склад акруговых камісій
уключана прадстаўнікоў Камуністычнай партыі Беларусі — 175. Апазіцыйныя партыі
атрымалі ў камісіях 72 месцы, у тым ліку 48 чалавек прадстаўляюць Беларускую
партыю левых "Справядлівы свет", 14 — Аб'яднаную грамадзянскую партыю,
6 — Партыю БНФ, 3 — Беларускую сацыял-дэмакратычную Грамаду, 1 — Беларускую
сацыял-дэмакратычную партыю (Грамада).
Акрамя гэтага, у склад камісій увайшлі 19 прадстаўнікоў Беларускай аграрнай
партыі, 16 — Ліберальна-дэмакратычнай партыі, 12 — Рэспубліканскай партыі працы
і справядлівасці, 5 — Сацыял-дэмакратычнай партыі народнай згоды, 3 —
Беларускай сацыяльна-спартовай партыі.
У склад акруговых выбарчых камісій таксама ўвайшлі 319 прадстаўнікоў
грамадскага аб'яднання "Белая Русь", 332 — Беларускага
рэспубліканскага саюза моладзі, 218 — Беларускага саюза жанчын, 225 —
Беларускага грамадскага аб'яднання ветэранаў, 701 — Федэрацыі прафсаюзаў
Беларусі.
Выбары ў мясцовыя саветы дэпутатаў пройдуць 25 красавіка 2010 году.