Главная » 2010 » Апрель » 26 » Яўка выбаршчыкаў на мясцовыя выбары склала 79,1%
Яўка выбаршчыкаў на мясцовыя выбары склала 79,1%
12:21
Яўка выбаршчыкаў на выбары ў мясцовыя саветы
25 красавіка склала 79,1%, паведаміла Цэнтральная камісія па выбарах і
правядзенні рэспубліканскіх рэферэндумаў. Гэта на 0,1% менш, чым на мясцовых
выбарах 2007 года.
На ўчасткі прыйшло 5.560.418 чалавек, якія маюць права голасу.
Найбольшая
яўка зафіксавана ў Віцебскай вобласці — 90,9%. Далей ідуць Магілёўская вобласць
— 85,7%, Гомельская — 84,4%, Мінская — 81,7%, Гродзенская — 80,6%, Брэсцкая —
78,7% і горад Мінск — 58,7%.
У дзень выбараў у спісы выбаршчыкаў было ўключана 21.385 чалавек (ад 650 у
Гродзенскай вобласці да 6.232 у Брэсцкай; у Мінску — 2.853).
Яўка на датэрміновае галасаванне склала 29,3% (ад 23,5% у Мінску да 34,3% у
Магілёўскай вобласці), што на 4,4 працэнтныя пункты вышэй, чым на папярэдніх
мясцовых выбарах у 2007 годзе.
Каментуючы высокую яўку выбаршчыкаў, сакратар Цэнтральнай камісіі па выбарах і
правядзенні рэспубліканскіх рэферэндумаў Мікалай Лазавік заявіў БелаПАН, што яе
забяспечылі "добрая арганізатарская праца прадстаўнікоў выбарчых
камісій", а таксама "высокая грамадзянская свядомасць
выбаршчыкаў".
Паводле слоў Лазавіка, падчас датэрміновага і асноўнага галасавання не было
зафіксавана парушэнняў, якія маглі б паўплываць на вынікі. Ён падкрэсліў, што
гэта адзначалі як арганізатары выбараў, так і назіральнікі і самі кандыдаты ў
дэпутаты.
"Вядома, недапрацоўкі былі, але пад сумненне вынікі выбараў яны паставіць
не могуць", — сказаў Лазавік.
У 2007 годзе яўка на выбары ў мясцовыя саветы склала 79,2% (ад 60% у Мінску да
90,4% у Віцебскай вобласці). Датэрмінова прагаласавала 24,9% выбаршчыкаў (ад
16,7% у Мінску да 30,7% у Гомельскай вобласці). На цяперашніх выбарах яўка
знізілася ў Брэсцкай вобласці (на 1,8%) і Мінску (на 1,3%), вырасла ў Мінскай
(на 0,1%), Гродзенскай (на 0,3%), Віцебскай (на 0,5%), Магілёўскай (на 1,2%) і
Гомельскай (на 1,3%) абласцях.